Մեր աշխատակիցները միջազգային կոնգրեսներում

ԵՊԲՀ հետբուհական և շարունակական կրթության ֆակուլտետի ակնաբուժության ամբիոնի պրոֆեսոր Հասմիկ Եղիազարյանը վերջերս մասնակցել է Մոսկվայում տեղի ունեցած միջազգային կոնգրեսի աշխատանքներին:

Ստորև տպագրված հոդվածում նա ներկայացնում է կոնգրեսի նպատակը, խնդիրները և նշանակությունը բժշկական հասարակության համար:

«Ռուսաստանի դաշնության, ԱՊՀ երկրների և Եվրոպայի առողջապահությունը» վերնագրով 3-րդ միջազգային կոնգրեսի կազմակերպիչներն էին բուժաշխատողների համառուսաստանյան միավորումը,«Բժշկությունը կյանքի որակի համար» համառուսական հասարակական շարժումը և պալիատիվ բժշկության Ռուսաստանի ասոցիացիան:

Կոնգրեսը բացեց բուժաշխատողների համառուսաստանյան միավորման վարչության նախագահ, բ.գ.դ., պրոֆեսոր Գ.Ա. Նովիկովը:

Բացման արարողությանը ողջույնի խոսքով ելույթ ունեցավ Ռուսաստանի սրտաբանական գիտաարտադրական համալիրի տնօրեն, Ռուսաստանի սրտաբանների գիտական միության պատվավոր նախագահ, ՌԳԱ և ՌԲԳԱ ակադեմիկոս, պրոֆեսոր Ե.Ի. Չազովը:

Բացման հանդիսավոր արարողությունը ավարտվեց բուժաշխատողների համառուսաստանյան միավորման և ռուսաստանյան բժշկական հասարակության համագործակցության համաձայնության ստորագրումով:

Հնչեցին զեկուցումներ Ռուսաստանի առողջապահական հիմնախնդիրների, առողջապահության զարգացման ուղիների, բարեփոխումների, առաջընթացի, ինչպես նաև Ավստրիական բժշկության գերազանց որակի, և Գերմանիայի առողջապահական զարգացման տենդենցների և առանձնահատկությունների վերաբերյալ: Հետաքրքիր էին հատկապես ավստրիական բժշկության ինովիացիոն անհատական բուժման, հիմնական դրույթների, բնակչության օնկոլոգիական օգնության որակի և մատչելիության բարձրացման հեռանկարների և արդիական խնդիրների, ինչպես նաև առանց հավելյալ ազդեցության քիմիաբուժման (թերապիայի) մասին ելույթները: 

Առանձնակի ընդգծվեց բուժքույրերի ասոցիացիայի դերը մասնագիտական կրթության զարգացման մեջ:

Պլենար նիստից հետո կոնգրեսի աշխատանքները ընթացան երեք ստորաբաժիններով` պալիատիվ բժշկական օգնություն` ներկա վիճակն ու զարգացման հեռանկարները, բուժկազմակերպությունների գործունեության արդիական ասպեկտները, բնակչության ուռուցքաբանական օգնության որակի և մատչելիության բարձրացման հեռանկարները և արդիական խնդիրները, մոնիթորինգի և հսկողության մեխանիզմները: 

Կոնգրեսի աշխատանքներին առաջին անգամ ներկայություն ցուցաբերեց Հայաստանը: Նախորդ` 1-ին և 2-րդ միջազգային կոնգրեսներին հայ գիտնականները մասնակցել են հոդվածների և թեզիսների ձևով: Կոնգրեսի կազմկոմիտեն մեծ հարգանքով և պատվով ընդունեց իմ մասնակցելու ցանկությունը` զեկուցողի կարգավիճակով: Սակայն ավելի հաճելի էր, երբ բացման օրը իմացա, որ պաշտոնապես Հայաստանի Հանրապետության ներկայացուցչին տեղ են հատկացրել բացման արարողության նախագահությունում: Իսկ կոնգրեսի ծրագրին անոթանալուց հետո բարձր պատասխանատվության զգացումով ընդունեցի այն փաստը, որ ինձ նշանակել էին 2-րդ` «Բուժկազմակերպությունների  գործունեության արդիական ասպեկտները ժամանակակից պայմաններում» բաժնի համանախագահ: Պետք է նշեմ, որ բոլոր ելույթները հետաքրքիր և բազմաբովանդակ էին: Իմ ներկայացրած զեկուցման վերնագիրն էր «ՀՀ մանկական ակնաբուժական օգնության կազմակերպման տարածաշրջանային առանձնահատկությունները», որտեղ ներկայացված էր լայնածավալ աշխատանքի արդյունքները մանկական ակնաբուժական օգնության կազմակերպման և ցուցաբերման մոդելի ստեղծման, կիրառման, սքրինինգային ծրագրերի ներդրման, ծառայությունների գործունեության գնահատման և բժշկական արդյունավետության վերաբերյալ ՀՀ տարածաշրջաններում (Շիրակ, Լոռի, Սյունիք) և ԼՂՀ-ում:

 Միաժամանակ ուզում եմ նշել, որ հանդիսանում եմ ԱՊՀ երկրների «Աչքի առաջնային հատվածի» փորձագիտական խորհրդի անդամ: 2012-ին ապրիլին Բարսելոնա քաղաքում հանդես եմ եկել ելույթով` «ՀՀ մանկական և պատանեկան բնակչության աչքի առաջնային մակերեսի հիվանդությունների տարածվածության համաճարակաբանական բնութագիրը» թեմայով: 

Կարծում եմ` ԵՊԲՀ համագործակցությունը ՌԴ բժշկական համաժողովների և կոնգրեսների միջոցով կունենա շարունակական և հեռանկարային բնույթ և կնպաստի Հայաստանի գիտաբժշկական ներուժի ներկայացմանը միջազգային ասպարեզում, մասնագիտական փորձի փոխանակմանը, ինչպես նաև առողջապահական և բժշկական հիմնախնդիրների ընդհանուր քննարկմանը տարբեր տարածաշրջանային մակարդակներում:

Հարցեր, պատասխաններ, մեկնաբանություններ